Господи Иисусе Христе, благословляяй и освящаяй всяческая молитвою и призыванием всесвятаго Имене Твоего, благослови колесницу сию, юже раб твой (имя) стяжа, и да будет сия ему во благую потребу, в служение нуждам его и ближних.
Ей, Господи, приклони ухо Твое и услыши ны в час сей, и благословением Твоим сохрани раба Твоего и всякаго инаго, ею пользующагося от всякого сопротивного обстояния и всякаго вреда человеком ли, или скотом.
Твое бо есть еже миловати и спасати ны, Боже наш, и Тебе славу возсылаем со Отцем и Святым Духом, всегда, ныне и присно и во веки веков. Аминь.
Господи, Боже наш, безначальне, блаже, Содетелю всех и Творче всего сущаго, Едине Святе, Едине по существу безгрешне, научивый ны Божественным Твоим словом почитати вся Тобою созданная добра быти, и заповедь давый праотцем нашим, еще в раи сущим, возделовати ея, молим Тя, Владыко Святый, призыванием всесвятаго Имене Твоего и окроплением воды сея священныя, благослови колесницу сию, юже стяжа раб Твой (имя), и даждь ему надежду, яже о Тебе, и сохрани его от всякия беды и напасти пользующемуся и всякому иному живому существу, Тобою созданному. Ты бо еси Бог всяческих, Ты един еси Хранитель Святый и Заступник державный, и Тебе славу вси возсылаем, ныне и присно и во веки веков. Аминь.
Из: Архимандрит Софроний (Сахаров). Молитвенное приношение. М. Паломник. 2004.
No comments:
Post a Comment